UFC-д хүч үзэх мөрөөдөлтэй холимог тулаанч

0
0
304

Энэ  удаагийн  онцлох тамирчнаар холимог тулаанч Б.Баттөрийн тухай хүргэхээр бэлтгэлээ. Цахим ертөнцөд Ангууч нэрээр алдаршсан тэрээр тулааны урлагаас гадна спортын олон төрөлд өөрийгөө сорьдог нэгэн.

Мэргэжлийн тулаанч

Б.Баттөр багаасаа тулааны спортоор хичээллэж эхэлжээ. Аав нь төрсөн өдрөөр нь боксын бээлий бэлэглэсэнтэй холбоотой. Хүүхэд байхдаа их шазруун, дураараа зантай байсан гэдэг. Тухайн үед аав нь буруу зүйл хийхэд нь гарыг өргүүлж зогсоодог байжээ. Энэ үеэс л өөрийгөө хатуужилтай болж эхэлсэн гэж бага насныхаа тухай дурссан байдаг.

Тэрээр холимог тулаанаас гадна таеквандогоор хичээллэдэг. Энэ төрлийн улсын аварга болсон туршлагатай.Таеквондогийн насанд хүрэгчдийн УАШТ-ий багийн төрөлд тэрээр Риогийн олимпод оролцсон туршлагатай тамирчин П.Тэмүүжин, Азийн наадмын хүрэл медальт М.Түмэнбаяр нартай нэг баг болж өрсөлдөөд алтан медаль хүртсэн юм. Б.Баттөрийн туйлын зорилго нь “UFC”-д хүч үзэж, эх орныхоо нэрийг дуурсгах. Түүний амьдралын хамгийн гоё мэдрэмжийнх нь нэг ринген дээр гарах. Учир нь тэрээр өөрийгөө сорьсон, эрч хүчтэй амьдралын хэмнэлтэй нэгэн юм.

Хүнд цохилтоор өрсөлдөгчөө ялав

Б.Баттөрийн хамгийн сүүлийн үеийн амжилт гэвэл саяхан АНУ-ын Сан Франциско хотод болсон Олон Улсын тулааны тэмцээнд эзэн орны тамирчин Нэйтан Монтаног 24 секундэд хүнд цохилтоор ялсан юм. Энэ удаагийн тэмцээнийг Монгол холимог тулааны “MFC” буюу “Mongol Fighting Championship” холбооноос зохион байгуулсан.

Тэмцээнд Б.Баттөртэй хамт Ө.Тэмүүжин, П.Өнөрбат, М.Нандин-Эрдэнэ нар оролцсон юм. Тэмцээний үеэр тулаан болж буй 4000 үзэгчтэй Кезар Павиллон ордонд Монгол Улсаас Сан Франциско хотод суугаа Ерөнхий консулын газрынхан монгол тамирчдаа дэмжиж очжээ. Ойролцоогоор 500 гаруй монголчууд цугласан гэж албан ёсны цахим хуудаст нь бичжээ. Б.Баттөрийн хувьд үүнээс өмнө 2019 онд “Mongol FC-1” өдөрлөгийн хүрээнд Казахстаны Али Кабдуллатай тулалдаж, ялагдаад байсан юм.

Сайн үйлстэн

Б.Баттөрийн хувьд зөвхөн спортоор хичээллээд зогсохгүй нийгэмд хандсан сайн үйлсийн аянг зохион байгуулж, хандив өгдөгөөрөө алдартай. Тэрээр хамгийн сүүлд долдугаар сард төрсөн өдрөөрөө найман дүү, есөн сартай охиноо ганцаараа өсгөж буй 22 настай Г.Ариунболорт гурван өрөө байр авах мөнгө цуглуулж өгчээ. Охины хувьд ээжийгээ зуурдаар алдаад удаагүй байсан юм. Ангууч энэ үеэрээ “Би төрсөн өдрөөрөө зүгээр наргиж, цэнгээд өнгөрөхийг хүсээгүй.

Нэг хүнд ч болтугай тус болж, баярлуулахыг хүссэн юм. Сүүлийн нэг сар би энэ хүүхдүүдийн тухай их бодсон. Хүүхэд бүхэн аз жаргалтай инээмсэглэж амьдраасай гэж хүсдэг. Өнөөдөр нэг мөрөөдлөө биелүүллээ” гэж сэтгэгдлээ илэрхийлсэн юм. Түүнийг спортын хүрээнийхэн шулуун зантай гэж дүгнэдэг бөгөөд эхлүүлсэн ажлынхаа заавал эцсийг нь үздэг хэмээн магтах нь бий. Үүнээс гадна тэрээр “Лантуун дохио” төрийн бус байгууллагын “Ид шидийн орон” төсөлд ч өөрийн тулаанд ялсан шагналынхаа мөнгөнөөс  3000 ам.доллар хандивлаж байсныг уншигчид санаж байгаа байх.

 “Бүжиг намайг асаадаг”

Ангууч охид бүсгүйчүүдийн зүрх сэтгэлийг эзэмдэх болсон нь “Ододтой бүжиглэе” шоутай шууд холбоотой. Энэ шоуны дараа цахим орчинд түүний дагагч огцом нэмэгдсэн юм. Тэрээр үзэгчдийг 13 долоо хоногийн турш дэлгэцийн өмнө уясан.

Сүүлийн мөчид хамтрагч Б.Халиуны хамт шоуны ялагч болж 50 сая төгрөгөөр шагнуулав. Энэ мөнгөө тэрээр мөн л НҮБ-ын “Хүүхдийн сан”-д хандивлана гэдгээ мэдэгдсэн юм. Б.Баттөр үзүүлбэрээс үзүүлбэрийн хооронд улам туршлагажиж, эрч хүчтэй, гал гарсан үзүүлбэрүүдийг үзүүлж байсан нь шоуг улам чимж, өнгө оруулсан гэж шүүгчид онцолж байлаа. Харин ялагч маань “Бүжиг намайг асаадаг. Энэ шоунд оролцсоноор өөрийгөө улам нээж, эрч хүчийг мэдэрлээ” гэсэн юм.

Тайзны модель

Б.Баттөрийг мэргэжлийн загвар өмсөгч гэдгийг нь хүмүүс төдийлэн мэддэггүй. Тэгвэл тэрээр бүр Олон Улсын загварын шоунд оролцож, тайзан дээр гялалзаж явсан сүүхэйтэй нэгэн. 2017 онд Тайландад болсон “Manhunt international 2017” шоуны шилдэг 15 загвар өмсөгчийн нэг болж “Mister Sunshine Smile” шагналын эзэн болсон юм.

Үүнээс гадна 2016 онд “Сайн уу, амьдрал минь”, 2019 онд 10 ангитай “Анагаахын алдартнууд” кинонд тоглож жүжиглэх авьяасаа ч харуулаад авсан. Мөн “Юнител”, “Гоё”, монгол дахь “Calvin Klein” зэрэг брэндийн нүүр царай  ч болж байв.

Эх сурвалж: “Зууны мэдээ” сонин

Бусад Төсөөтэй нийтлэл
Цааш нь Admin
Өшөө News

Leave a Reply

Your email address will not be published. Required fields are marked *

Танд санал болгох

Манай хохирогч охин 6 цаг зодуулсан гэж байгаа боловч эсрэг талаас няцааж 5 минут болсон гэгчлэн өөрсдийгөө мэдээж өмгөөлж шийтгэлээс бултах

Солонгос улсад амьдардаг манай Монгол улсын 13 настай охиныг сургуулийнх нь Солонгос сурга…